2005 WOMAN OF BEARE sculpture




Caillech Bérri Buí

Aithbe dam cen bés mora
sentu fom-dera croan;
toirsi oca cia do-gneo
sono do-tét a loan.

Is mé Caillech Bérri Buí,
no meilinn léini mbithnuí;
in-diu táthum dom shéimi
ná melainn cid aithléini.


It moíni
cartar lib, nídat doíni;
sinni, ind indbaid marsaimme
batar doíni carsaimme.

Batar inmaini doíni
ata maige ‘ma-ríadam;
ba maith no mmeilmis leo
ba bec no maitis faram.

In-diu trá caín-timgarat
ocus ní mór non aithet;
cíasu bec do-n-indagat
is mor a mét no maithet.


Carpait lúaith
ocus eich no beirtis búaid,
rom boí denus tuile díb ---
bennacht for ríg roda úaid.

Tocair mo chorp co n-áigthe
dochum adbae díráichne;
tan bas mithig la Mac nDé
do-té do brith a aithne.
Ot é cnámacha coela
ó do-éctar mo láma ---
ba inmain dán do-gnítis,
bítis im ríga rána.

Ó do-éctar mo láma ---
ot é cnámacha coela,
nídat fíu turcbàil, taccu,
súas tarsna maccu coema

It fáilti na ingena
ó thic dóib co Beltaine;
is deithbiriu damsa brón:
sech am tróg, am sentainne.

Ní feraim coirm maith milis,
ní marbtar muilt dom banais;
is bec is líath mo thrilis,
ní líach drochcaille tarais.

Ní olc liumm
cia beith caille finn form chiunn;
boí mór meither cech datha
form chiunn 

Ním-gaib format fri nach sen
Oc ól daglatha.
inge na-mmá fri Femen;
messe, rom miult forbuid sin,
buide beus barr Femin.

Lie na Rig i Femun,
Caithir Rónáin i mBregun,
cían ó ros-síachtar sína;
a lleicne nít sencherína.

Is labar tonn mora máir
ros gab in gaim cumgabáil;
fer maith, macc moga, in-diu
ní frescim do chéilidiu.

Is mó láu
nád muir n-oíted imma-ráu;
testa már mblíadnae dom chruth
dáig fo-rroimled mo chétluth.

Is mó dé 
damsa in-diu cen buith té;
gaibthi m’étach cid fri gréin
do-fil aes dom aithgin féin.

Sam oíted i rrabamur
do-miult cona fhagamur;
gaim aís báides cech nduine
dom-ánaic a fhochmuine.

Ro miult m’oítid ar thuus;
is buide lemm ron gleus,
cid bec mo léim dar duae
nípa nuae in bratt beus.

Is álainn in bratt úainni
ro scar mo Rí tar drummain;
is saer in Fer nod lúaidi,
do-rat loí fair íar lummain.

Am minecán, mon-úar dam,
cach derc caín is erchraide,
iar feis fri caindlea sorchai
bíthum dorchae derthaige.

Rom boí denus la ríga
oc ól meda ocus fhína;
in-diu ibim medguisce
eter sentainni crína.

Rop ed mo choirm cóidin meidg
ropo toil Dé cecham-theirb;
oc do guidisiu, a Dé bí,
do-rata cró clí fri feirg.

Ad-cíu form bratt brothrach n-aís;
ro gab mo chíall mo thogaís;
líath a finn ásas trim thoinn
is samlaid crotball senchroinn.

Rucad úaimse mo shúil des
dia reic ar thír mbithdíles;
ocus rucad int shúil chlé
do fhormach a fhoirdílse. 

Tonn tuili
ocus ind í aithbi áin;
a ndo-beir tonn tuili dait
beirid tonn aithbi as do láim.

Tonn tuili
ocus ind aile aithbi,
dom-áncatarsa uili
conda éolach a n-aithgni.

Tonn tuili
nícon toracht mo chuili;
cid mór mo dám fo-déine
fo-cress lám forru uili.

Ma ro fiad Macc Maire
co mbeth fo chlí mo chuile,
eni dernsa gart cenae
ní érburt ‘nacc’ fri duine.

Tróg n-uile ---
dofriu dúlib in duine ---
nád ndéccas a n-aithbe-se
feib dorr-éccas a tuile.

Céinmair insi mora máir,
dons-ic tuile íarna tráig;
os mé, ní frescu dom-í
tuile tar ési n-aithbi.

Is súaill mo mennat in-diu
ara taibrinnse aithgniu:
a n-í ro boí for tuiliu
a-tá uile for aithbiu.